Gələcək çox tez gələcək

“Gələcək çox tez gələcək” təkcə elmi-publisistik məqalələr toplusu deyil, o, gələcəyə atılmış bir düşüncə körpüsüdür. Kitab oxucunu zamanın təkərləri arasında səssizcə fırlanan, böyük inqilablar doğuran ideyalar səyahətinə çıxarır; bu nəşr insan ruhunun aydınlığa can atmasının təcəssümüdür. Buradakı yazılar müstəqil mətnlər deyil – onlar bir bütövün, müəllifin elmifəlsəfi dünyagörüşünün parçalarıdır. İbrahim Nəbioğlunun futuristik baxışı, elm və texnologiyanın sosial transformasiyaya təsirinə dair mülahizələri həm klassik, həm də çağdaş düşüncə sistemlərinə inteqrasiyası ilə seçilir. Kitabda cəmiyyətin intellektual inkişafının müxtəlif aspektləri nəzərdən keçirilir. Bu yanaşma xüsusilə də maarifçilik ənənələrinin bərpası və intellektual mədəniyyətin inkişafı baxımından əhəmiyyətlidir. Qərb və Şərq elmi-fəlsəfi irsinin təhlili üzərində qurulmuş araşdırmalar nəhəng alim və filosofların ideyalarının analizi, onların cəmiyyətə və fərdi dünyagörüşünə təsiri kontekstində şərh olunur. Kitabın dili, üslubu sadə və anlaşılandır, əsər geniş oxucu auditoriyası üçün əlçatan şəkildə qələmə alınıb, ideyalar sadə strukturlarla izah olunub. “Gələcək çox tez gələcək” sadəcə kitabın adı deyil, o həm də bir çağırışdır, xəbərdarlıqdır, cəmiyyətin gələcəklə ayaqlaşmaq üçün elmə, biliyə və düşüncəyə sarılmaq zərurətidir. Bu kitab Azərbaycan intellektual mühitində mühüm yer tutacaq əsərlərdən biridir.