Üçüncü variant

Metal pulu atanda adama elə gəlir ki, yalnız iki variant ola bilər: ya sikkənin rəsm, ya da rəqəm olan üzü düşər. Əslində isə üçüncü variant da mümkündür. Sikkə “alçı dura” bilir. Yaxud heç yerə düşmür, harasa ilişib qalır. Ya da elə yerə düşür ki, onu heç tapa bilmirik. Bax, bu, üçüncü variantdır. Bu variantda cavab birmənalı olmur. Əsər Əfqanıstandakı ədalətsiz müharibədə əlil olan bir insanın faciəsindən bəhs edir. O, SSRİ-nin çöküşü ilə dövlət himayəsindən məhrum qalıb. Çıxılmaz vəziyyətlərdən çıxmağa çalışır. Qəhrəmandan qatilə çevrilir. Həyatdakı ən böyük arzusu isə övladına atalıq edə bil-məkdir. Qarşıda iki yol var: ya qəhrəmanlıq, ya da içkiyə qurşanıb məhv olmaq. O isə üçüncü variantın mümkünlüyünü sübut edir və qatilə çevrilir. Tək əlli qatilə! Üçüncü variantı tapaq istəyi onu böyük bir dövlətin mafiyaya çevrilmiş məmurlarının quldur şəbəkəsi ilə mücadiləyə sövq edir.