Nadir şah

Quldurluqla məşğul olan bir şəxs gözlənilmədən böyük sərkərdəyə çevrilir. Daha sonra şahlıq taxtına yiyələnir. Bəs bütün bunlar necə baş verir? Oxucu süjet boyu bu prosesi izləyir. Nadirin şəxsiyyət kimi kamilləşməsinə şahidlik edir. Lakin saray intriqaları, əyanların qurduğu hiylələr bu müzəffər şahı istəkli oğlunun cəlladına çevirir. “Nadir şah” faciəsi səfəvi xanədanlığının çöküşü ilə başlayır. Sultan Hüseyn Səfəvinin zəifliyi ölkədə ədalətsizliyə və özbaşınalığa rəvac verib. Şah Təhmasibin zamanında da heç nə dəyişmir. Nəticədə Nadir onu devirərək səltənəti öz əlinə keçirir. Onun tragediyası da burdan başlayır. Pyes avam camaatı fanatizm və dini əsarətdən qurtarmağa, real düşünməyə çağırır. Eyni zamanda, vətənin dirçəlməsi üçün ədalətli idarəçilik sisteminin vacibliyini göstərir.